مالات حرب : ازهري عثمان.. خريطة امدرمان ياها خريطة السودان ومؤتمر الخريجين يميزها.

أجدادنا قطعوا المفروض فيهو الوصال، ولكن!!!
في السودان 570 قبيلة يتحدثون أكثر من 114 لغة ولهجة محلية احتوتها (العاصمة المثلثة) وعلي راسها (امدرمان) وجاءت بلغة واحدة .
تباري الشعراء :
سيف الدسوقي (أعشق أنثى تلك المحبوبة أمدرمان) .
عبد الله محمد زين ( انا امدرمان انا السودان).
هاشم صديق (صورتك معاي، في كل المطارات
والمسارح والاغاني).

من مالات هذه الحرب اللعينة بعض من (حسرة) علي (جعل) امدرمان، الخرطوم والخرطوم بحري (العاصمة المثلثة ) اوطان، وبالتالي تم هجر الجذور في اقاليم وحلالات وقري السودان المختلفة .
برزت (اسئلة) وسادت (قناعات وخلافات) بعد اندلاع الحرب ، فعلي المستوي الشخصي قلت (ادب مرحلة) في قروبنا (البيت الكبير): (جدي صديق، جدي عبد الحفيظ) ، (سوو) امدر وطن،  واترفع شعار العودة بعد الحرب (الرجوع الي الجذور) هههههه.
قلت وا (اسفاي) علي :
الجد صديق والجد عبد الحفيظ، سووا امدر وطن وحكمن الخيال، ما سالوا عن العقاب ، أهلنا في الشمال ، ويا حلاة الشعر عند هاشم ود صديق ، روائع تحكي جروف ووديان، خضرة، نخيل، بحر، رمال، جمال وفال، وكأنو ولدو في مساوي، وفيها صال وجال، ولا في مروي عندو كم ساقية وحبال، اجدادي : ما ( اصلوا)  بالدين، وقطعو المفروض، فيهو الوصال، وفي عز الحرب، مشينا شمال، شي مع نسابة، شي البيت الكبير، الما فات حدود امدرمان.
كان الاسف في القروب (حاضر) وقلنا بعد الحرب تنتهي نبدأ رحلة البحث عن الجذور ولكن !!!! .
ظهرت (الحقيقة) مجردة ، برقت وتلالأت وحالها ينادي و (يهتف) يقول : امدر وطن يا ناس، ومن اين (جئتم يا هؤلاء) كما قالها اديبنا الاريب الطيب صالح.
حقيقة (مرة) حسدونا فيك، حسدونا ناس مفطورة علي (الفساد) (الجهوية) و الانحطاط، ، (بس) ما اتزحزحت ثوابت، الجبال ياها الجبال، البحر ياهو البحر.
قالوا الاوطان (الفرحانين) بيها الي زوال (وين يا) سجل اراضي، مسرح، تلفزيون، اذاعة هنا امدرمان وهنا السودان  (وين يا) .
امدرمان وطنيا :
امدرمان ناريخيا، جغرافيا، ثقافيا ووطنيا تتميز بالكثير ولكن دعونا في هذه العجالة نتحدث عن (الوطنية) ، ففي ثلاثينيات القرن الماضي شهدت أم درمان نشوء حركة وطنية سياسية تمثلت في (مؤتمر الخريجين) الذي طالب الحكم الثنائي الاستعماري بمنح السودانيين حق تقرير المصير وتمكينهم من إقامة دولتهم المستقلة ذات السيادة.
انسان امدرمان بسطة في الجسم والعقل
حقيقة (مجردة) امدر عظمة وشموخ وشانها شأن الخرطوم وبحري وكل السودان، فالمدن التجارية الكبيرة تقتصر المسافات وتنهي عقدة القبلية بالمصاهرة .
اكيد المفروض كان الوصال من الدين ، (بس) انقطع وجاء ب (خلطات) عجيبة تجدهم (بسطة في الجسم والعقل) وهذا (دين وتاصيل) برضو .
فهي الرموز الوطنية الخالدة انسان، امكنة، طبيعة جماد وبحر … الخ.
خريطة السودان، ياها امدرمان، ياها الميناء المورد، ياها انسان السودان ، قول خلاسي (بعضه عربي بعضه زنجي) وتحية للرائع (محمد المكي ابراهيم) والاروع الفنان الانسان ابو عركي البخيت.
قول جدو (حلبي) كان (برقص) قرد، ورقيص القرد (امتد لي صيد) في البحر (مقرن النيلين) و(اتحدي) حتي التمساح، وياما اكلنا لحم تماسيح في حي (المواليد) والعجب (فسيخ) الجاك نجرو.
التصاهر العجيب (خلطة سحرية)
قول جعافرة وشوايقة بقولوا نحنا اشراف وحققوا الاية ( لا فرق بين عربي ولا اجنبي الا بالتقوي) صدق الله العظيم. اتصاهروا مع الجنوبيين والنوبة ، ناس فريق تاما، العمايا مع الامراء. فريق فنقر، مع فريق ريد وناس قدح الدم، السادات، الفيل، عقارب، الامين حامد (العمراب). الرباطاب، العبابدة والقائمة تطول، واندثرت الرطانة عند المحس، الدناقلة، النوبة، النوبيين،… الخ. وبقت لغة وسط عربي لا فيهو (لكنة) لا (جرة ) .
وحقيقة اذا كان في السودان حوالي 570 ويتحدثون أكثر من 114 لغة ولهجة محلية فاني اجزم بان امدرمان احتوتهم جمعيا.
الاعتداد بامدر (لماذا)؟ سؤال الإجابة عليه تحتاج لمجلدات ومما (اسلفت) تتضح بعض (الحقائق) ولكن تبقي قاصرة،
امدر العز والشموخ هيلك ، نتوشح  علمك نعشق ترابك ، بدلناك بي جنوب، بي  شمال، بي شرق بي غرب، بي وسط وبقيتي لينا وطن، نبدلك، نفوتك دا محال .
صحي كلام الحرب كان مخيف علي الاطفال، الامهات، الجدود الحبوبات، بس نحمد الله البركة في الشباب ، الاستنفروا لبسوا الميري واتعسكروا ودافعوا عن الحياض.
وكان (ادب مرحلة) شبابنا الثائر اتدرب واشيل مدافع ودانات كلاشات وحتي المسيرات .
(انا امدرمان انا السودان) للشاعر عبد الله محمد زين خال عضو قروبَات (بانت، الموردة… الخ) الحبوب الجميل احمد مسعود.
مبارك المغربي ،اغنية ما عشقتك لي جمالك. ماعشقتك لي جمالك أنت اية من الجمال وهويتك لي خصالك انت اسما الناس خصال او لروحك لي دلالك انت اية من الجمال الفؤاد دائمآ بينادي.
الاستاذ/ هاشم صديق تناول امدرمان في الكثير من قصائده وخصص واحدة من ابياتها :
صورتك معاي
القاها في كل المطارات
والمسارح والاغاني
….
صورتك دوام جلد الطريق
حبر الحروف
هي الاسم ختم السفارة
التصاريح… التسابيح
النياشين. . الامارة
…..
وفي الاغاني :
كل البنات امونة يا خرطوم
معاي ساعة افتح الدكان
معاي ساعة الدرس بالليل
معاي في البص علي امدرمان
الخ….. وتطول المسألة.
العملاق سيف الدين الدسوقي يقول في قصيدته المشهورة
هذا قدري إما أن أعشق أنثى للإنسان أو أعشق أنثى تلك المحبوبة أمدرمان.
الاستاذ / عبد النبي مرسال وديوان علي الطزيق ورسم صور امدر بالحروف المموسقة المعبرة. .
الاستاذ / ميرغني حسن علي وشخصيات من الموردة توثيق (مهم) لياتي الاستاذ / اسعد يوسف محمد (توثيق) امتداد لعمالقة في هذا المجال. و(دا) كلو علي سيل المثال.
انا القصة يا امدرمان، عندما التقي عبد المنعم عبد الحي، حمد الريح، ود الحاوي. كانت بين (اليقظة والأحلام) .
الاستاذ / مهدي يوسف ابراهيم. دردشة مع غيمة في امدرمان.
خلاصة؛
الاستاذ / التجاني الحاج موسي (عباسية موردة أ (هي) (امي الله اسلمك) (ابوي لي تسلم) ويا :
جمال النيل والخرطوم بليل
يا راضعة من نيلين حضنوك من ازمان
يا قبلة الزائرين.. يا درة السودان
ضمخ شذي الياسمين والورد والريحان .
عاشق سمر بالليل سحرهم جمال النيل
أجمل ليالي هنا لما القمر يظهر….
والونسة تبقي غنا والغنية تتنقل
ونفوت علي ام درمان وهناك نكون أجمل
لو بس تطول يا ليل وتزيد جمال النيل
في حضرة المجموعة المبدعة عقد الجلاد.
خلاصة الخلاصة؛
السودان وطن يسع الجميع، حنبنيهو البنحلم بيهو يوماتي.