ستفوا شنط التفاؤل كوم،باكر سودانا بخيرو قادم تاني فيهو نعوم
لا عنصرية لا جهوية لا خطابات للكراهيه
نقول العايزنو كلنا بالصوت الجمهور لا محبوس ولا ممنوع ولا محظور
بس الحرابة تقيف ولازم تقيف اليوم قبال باكر وتتفرز الكيمان ونعيش سوا في سلام وامان واطمئنان
دعوا الأشجار والازهار والغابات والحقول تنمو وتزدهر وتخضر لتغرد تلك العصافير جزلي وفرحي ومرحي بلا نواح اواتراح في حوشنا ذلك الكبير السودان
تاني نفتح الطاقات والشبابيك والنفجات وتعم الديار الحفلات و المهرجانات والمسرات وتلك الزغاريد والابتهاجات
العايزنو مابتم ليهم طالما النفس فينا طالع ونازل والشوارع بتلمنا بالعديل والزين
وحدوا المواقف والصفوف والهتاف العالي الجهور لابديل للسودان الا السودان الموحد
توفير معينات الحياه الكريمه والضروريه للمواطنين حق وليست منحه من احد ولا صدقه ولا احسان
بالبيان العيان والاطمئنان عيالنا للمدارس والمسارح ودورالتثاقف والوعي والتنوير يساهموا في بناء إرث وثقافه السودان الموحد بلا ارتهان ولاوصايه ولا ولاء الا للسودان الكبير
تشرق شمسك ياسودان العز والشموخ والصمود كل صباح جديد بالتفاؤل الموعود والبشريات القادمات بلاحدود وباكر ينعدل الحال وينصلح ويطيب ونبنيك موحدا كما نهوي ونريد وليس ذلك ببعيد شده وتزول بإذن الله تعالى مابتطول باخلاصنا ووحدتنا ودفاعنا عن حقوقنا المشروعه سلميا
بخلاف ذلك:
الما بدورك بحدر ليك في الضلام
الي ان نلتقي يبقي الود بيننا
غدا تخضر الأرض اليباب
الطيب كنونه
